Amado I. Yoro
Mamatika a ti Dingras Organization of Hawaii ket nabangon pay la idi 1925? Ken kameng kadi iti Oahu Filipino Community Council [OFCC] ti payong dagiti amin a gunglo Filipino iti Hawaii a nabangon idi Hunio 1959?
“Wen, Hunio 25, 1925 a nabangon” kinuna ni Frank Anno, agdama a presidente. “Segun dagiti naggal-allawat nga impormasion, nabangon pay la ti gunglomi nabiit pay met a nagsangpet ti Filipino iti Hawaii,” innayon toy maysa a pangamaen iti gimong. Nupay saan a nakaipatulod iti delegadona iti kaudian a kombension ti OFCC idi Hunio 21, 2008, pinabarona manen ti panagtuloyna a kameng iti OFCC iti agdama, 2008-2009.
“Ladingitek laeng ta saankon a malagip wenno ammo no asino ti immuna a nagpresidente. Ngem patiek a ti panggep daytoy a gunglo ket tapno makapagkaykaysa ken makitimpuyog dagiti kameng. Agtitinnulong iti pakaseknan dagiti agkakailian.”
“Ket idi apagsangpetak iti Hawaii idi Hulio 17, 1960, isu metten a naikamengak gapu iti awis ni Mrs. Dolores Manzanillo, ti agdama idi a presidente”.
Ket idi eleksion ti opisial idi 1961, napagasatan ni Frank Anno a presidente. Adda aganay a 150 ti kameng kadagidi a tiempo. Ti imasna a karit daytoy, bumasbassit ti kameng.
Arapaap ni Anno ti makitinnulong a mangpasayaat ken makiinnadal a mangidur-as ti DoH babaen iti pannakidanggayna kadagiti kameng. Kalikagumanna a no ania ti masursurona a pagsayaat iti liderato, kasta koma met kadagiti padana kameng. Adda idi maysa a napinget a kameng a kayat ni Anno a masursuruan tapno agbalin met a lider wenno sumaruno a mangidaulo iti gunglo ngem simrek iti US Army, ngem ti imasna, idi nagretiro daytoy, isu metten a napan nagnaed idiay Washington State.
Idi 1975 nga isasarungkar ni Mayor Foz, insingasing ti mayor a maipatarus ti Pagalagadanda iti English gapu ta naisurat laeng iti Iluko. Ket no maaramid a kasta, saan la a dagiti taga Dingras koma ti agkameng. Pangpanggepen idin ni Anno nga irehistro iti Dept of Commerce and Consumer Affairs tapno aplikaranda ti masasao a tax exempt, tapno awan ti agparang a kas iti panangilanglangi iti kamengna. Naaramid a kasta babaen iti tulong ni Atorni Manera, a kasinsin ni Anno.
Aktibo latta ti DoH kadagidi a tiempo. Saan met a maaw-awan ti gunglomi kadagiti aktibidad ti komunidad, adda latta delegadomi tunggal kombension.
Adda idi panawen a nabuangay met ti Dingreneos of Hawaii idi 1980 babaen ti panangidaulo da Vic Anno ken Margarita Suyat ket kayatda a tumipon ti DoH tapno ad-adu ti kameng ken ad-adda a mapagkaykaysa dagiti sangkailian. Ti adatna, kinuna ni Anno [Frank], saan a nagpaut dayta iti di maawatan a rason.
Ania ti panggep ti Dingras Organization?
“Mangted ti arayat/wenno donasion a kuarta kadagiti pamilia a mapanawan no pumusay ti kameng. Ket no adda naan-anay a pondo, mangted met ti gunglo ti tulong idiay ili ti Dingras. Adda metten electric water pump a naited ti gunglo iti hospital sadiay.” kinuna ni Anno.
Tumultulong pay ti Dingras Organization of Hawaii iti American Red Cross ken Philippine Red Cross iti tinawen.
“Pinadasmi a pabaruen babaen iti reorganisasion idi 1998 ngem ti adatna adda dagiti saanen nga interesado ket dakami ti nabati a mangipatpataray ita uray no bassit ti bilangmi, kas namunganayan a gunglo dagiti taga Dingras, maaramidanmi ti mabaelanmi, nga aramiden,” kinuna ni Anno.
Dagiti agdama nga opisial ti Dingras Organization of Hawaii:
Frank Anno, presidente; Mrs. Elizabeth Ruiz, umuna a bise presidente; Mrs. Cristeta delos Santos,[Kauai] maikadua a bise presidente; Mrs. Ellen Endrina, sekretaria; Mrs. Carmana “Manny” Julian, tesorera; Mrs. Consolacion Cadiente, auditor, Mrs. Acela Garcia, PRO.
Sarhento de armas da Nathaniel Remigio ken Sam Garcia
Kameng ti hunta direktiba da: Norma Montero, Mary Bautista, Leonora Tano, Tessie Anno ken Alejandra Ignacio.
Mamagbaga da Ernest Julian ken Rosalinda Anno.
Kameng ni Frank Anno iti Filipino Catholic Club, Holy Name Society ken Knights of Columbus 5000 3rd degree. Ni dati a Tessie Fontejon Anno, ti Vigan, ti kaingungotna. Agnaed dagiti agassawa nga Anno iti Honolulu, Hawaii.
Kadagupan dagiti aganay a 40 a kameng ti Oahu Filipino Community Council [OFCC] a nangipabaro ti membership statusna itoy a tawen 2008-2009 ti Dingras Organization of Hawaii ti naammuan a napondar pay la idi 1925. Ti Narvacan Assn of Hawaii [1936] ken Candonians of Hawaii [1948] dagiti dua pay a nabangon sakbay ti 1959 nga opisial a pannakabangon ti Oahu Filipino Community Council [OFCC] a nagbalinen nga Islandwide Council dagiti Filipino organizations iti agdama.
[Saan amin nga existing Filipino organizations ket kamengda ita iti OFCC. Mabalin a kamengda kadagiti napalpalabas a tawen, ngem gapu iti probision ti OFCC constitution and bylaws, a nasken a tinawen iti panangbaro ken pannakabayad ti maitutop a membership fee, maibatay iti bilang ti kameng ti maseknan a gunglo. Agaw-awat latta ti OFCC Membership Committee nga ipanguluan toy nagsurat iti agtultuloy a panagpabaro kadagiti organisasionda. Ag-email laeng iti dakilangugat80@yahoocom]
[ANNUAL MEMBERSHIP FEE FOR OFCC
Adda naituding a gatad a bayadan tunggal gunglo iti tunggal tawen maibatay iti bilang dagiti kameng ti masnop a gungloda. [Section 1-Art X – Dues
Tinawen ti panangpabaro iti panagkameng. Awan ken saan a lifetime membership.]
Rehistrado ti Dingras Organization of Hawaii iti Dept. of Commerce and Consumer Affairs State of Hawaii. Addaan ti DoH iti 501[C]3 tax exempt. inggibus ni Anno..
======00000000=======
No comments:
Post a Comment